Follow us on social

搜尋結果: #演唱會

分離,對過去一、兩年的香港人來說,似乎已是等閒事。分離的傷感,或許曾經令你絕望,或許曾經令你號啕大哭,但當想到無論身在何地,心之所向,總有人與你抱持同一信念,會否可以感受到那絲微弱但強韌的力量?ToNick新歌《量子糾纏》,說的就是這樣的一個故事。 //與距離無關的羈絆// 「量子糾纏」,英文是Quantum Entanglement,徹頭徹尾的一個物理學概念,簡而言之宇宙是一個整體,無論分隔多少光年,一方的量子也可以對另一「糾纏」的量子產生幾乎瞬間的影響,令兩者幾近同步。 恆仔解釋,歌曲概念源自一次大學表演,為歌迷簽名時,對方要求寫幾句祝福說話,「我哋發現原來唔係寫畀佢,係寫畀一位暫時冇機會見面嘅朋友。」他續指,因為不同原因,有些人移民,有些人每日面對四面牆,但大家仍能聽到電台,所以當時他就答應那位歌迷,要寫一首歌,表達無論相距多遠,仍能一起同步。最後Carl叔叔(王雙駿)和小克把概念變為現實,「呢首歌喺好唔開心、諗緊點同大家connect嘅時候寫,希望可以畀力量鼓勵大家!」 小龜亦表示,「理解緊好理性嘅嘢,(歌詞)轉換成感性,小克用呢樣嘢嚟比喻,實在太正!」他憶述,收到歌詞時,他們(除了恆仔)都對甚麼是量子糾纏毫無頭緒,之後看了YouTube一些講科學的channel,開始了解背後意義,「study咗少少,睇呢首歌詞會感動啲,呢個係好勁嘅chemistry。」他興奮地說:「我覺得呢份詞最勁嘅地方就係,你越理解個現象,越發覺用佢嚟講我哋想要講嘅感情,會更加感動!」 //無需多言的聯繫// 那麼與ToNick分離的親友多嗎?「差唔多成個團隊走咗咁滯。」小龜即時盤點,「幫我哋做開sound engineering、做開ear mon嘅同事過咗去英國,以前嘅經理人何兆基去咗加拿大,跟咗好多年嘅化妝師又係去咗加拿大,有啲好熟嘅傳媒朋友都走咗去英國。」 所以ToNick又是如何與異地親友保持聯繫?晨曦直言,男性對於朋友,未必要常常見面,「就算喺香港,都唔係日日都要打電話。」Ryan認同:「睇到IG都大約估到佢心情狀態係點。」小龜補充:「我哋本身幾個嘅文化,大時大節都唔係好慶祝,邊個生日就『生日快樂』,唔需要講太多,大家知道大家係同步就得。」他們都相信,有事發生,「一call,應該都會八方支持!」 嗯,果然十分「量子糾纏」! //繞一圈後回歸原點// ToNick將於明年一月至二月在英國3個城市舉行演唱會,概念亦與歌曲主題有關。小龜表示,希望讓已移民的香港人「睇番睇過嘅演唱會,聽番聽過嘅歌」,同時亦見見當地親友。他笑言,正因不少團隊成員移民,「個邊都齊腳咁滯。」 演唱會名稱是「5949 Miles Connected」,恆仔說,含意是香港與英國的距離。他表示除了英國,亦正考慮在其他地方開show,「我哋幾多miles都會去,搵表演場地之餘,都希望喺嗰度搵到studio,每個地方都寫歌,創作完帶番嚟,再搞一個演唱會,到時就係 0 mile。」 至於演唱會內容,晨曦表示,「我哋係香港樂隊,玩廣東歌,想將廣東歌文化宣揚開去,不過都會入鄉隨俗,想搵當地音樂人擦出火花。」小劍立即把握機會宣傳:「所以如果咁啱移咗民去唔同地方,又咁啱識啲人可以籌備到,又咁啱睇到呢個訪問,歡迎聯絡!」 Photo: Mak@ACOO 量子糾纏MV

ToNick   廣東歌   演唱會   ...

說出來,好像自揭不夠專業。我選擇誠實。即使曾經算做填過幾首粵語流行曲的歌詞,自問對音樂一竅不通,興趣也不是特別大。至少,看演唱會,我從來不太熱衷,真正有興趣的,不超過十個歌手,其餘絕大部份看過的演唱會,也是為了陪伴女朋友,或者受到邀請不好意思推卻。 人就是犯賤。個個月有幾個演唱會可看的好日子,你不懂珍惜;一年看不到一個的時候,又懷念了。疫情期間,演唱會活動全面停頓,大家一齊閉關,沒有太大感受;來到英國,大家搶MIRROR演唱會飛搶到興高采烈,自己無法參與,才知道香港的演唱會還是有些重要性。同性相拒的MIRROR尚且如此,不敢想像異性相吸的COLLAR開騷時,會不會發了癲一樣飛返香港求人讓票。或者,你會說,2022年啦,呢位先生,在古墓睡了十六年嗎?今日的演唱會,好多時候設有網上直播服務,不用親身去紅館去九展,留在曼城的睡房,一樣欣賞得到。不用加入歌迷會,不用買保險,不用見到朋友搶到飛沒有送一張給自己便悶悶不樂呼天搶地。只要你有Wi-Fi。 我說,我沒有私人家庭影院,沒有高音甜中音準低音勁的名廠音響器材,得部電腦,用來煲劇也嫌影音質素差勁,別說用來欣賞需要感受現場氣氛的演唱會,就是拿來播《壯志凌雲:獨行俠》甚至《光年正傳》,也是浪費。網上看演唱會,我不如開個Apple Music,或者買隻CD播來聽?還有CD這回事的話。在英國接近一年,想買飛看Adele,買飛看Coldplay,是真的。沒有考慮過上網,然後對住螢幕鼓掌、跳舞與大合唱。 直到岑寧兒宣佈開騷。太太是岑寧兒歌迷,煮飯時聽,揸車時聽,沐浴時聽,我或多或少也耳濡目染。的確是一把扣人心弦的聲音。而且,覺得像岑寧兒這類以歌藝取勝的歌手,演唱會多數較為靜態,會比較適合網上欣賞。現場氣氛未必很熾熱,關了房門拉下窗簾,也可以做到接近效果?說不定比去現場觀看更自在,至少,保證身邊不會有一對小情侶不斷談心,說說前一晚吃的牛扒有幾好味,散場之後去百佳好還是去維多利亞更開心。也真夠神奇,網上睇騷竟然更加專心,合上眼,真有身處現場的錯覺。為何要合上眼?因為主辦單位太好心,在畫面上加插了歌詞的字幕,於是,加了一點卡拉OK feel,減了一點現場感。換了是另一個歌手,我肯定覺得多此一舉,放在岑寧兒身上,放在回歸廿五年之前的六月,一絕。我不是說岑寧兒的發音不準確,要看歌詞才明白她唱了甚麼;只是,有聽過她的作品,大概也會知道她有很多歌曲的內容也跟移民或離鄉別井扯上關係,對於身在異地的聽眾來說,無疑是一份寄託一份宣洩。太太感性,易哭,那一個下午,哭到不停,如果身處現場,應該會騷擾到附近觀眾。在自己的家,不怕。 八月,太太另一心頭好林家謙又會開個唱,希望一樣照顧到海外人士需要吧。在好多人心目中,香港還值得留戀的地方,已經所剩不多。

岑寧兒   演唱會   英國   ...

見到「Fight For」二字,你會諗起啲咩?一份前途無限嘅好工、盡快儲到首期上到車、得到心儀對象嘅青睞,定係完善選舉制度,加強保護國家安全?放喺唔同身分、唔同地位,以至唔同職業嘅人身上,大家爭取嘅嘢自然不盡相同,如果係一個流行樂歌手呢?有「隱世高手」美譽嘅陳柏宇(Jason)剛剛完成咗佢喺紅館一連兩場嘅演唱會,正正係以「Fight For ___」為題,其中「 ___」嘅自由填充部份實在係畫龍點睛之處,喺此時此刻嘅香港,我哋又有乜嘢需要fight for、值得fight for?   Jason「隱世高手」嘅稱號係幾年前由廣大網民賜封,「高手」當然係讚賞佢嘅實力,「隱世」或多或少係嘆息佢值得更多人嘅關注;的確,Jason一直以來都專注喺佢嘅音樂事業,並無好似好多同輩同行咁歌影視多棲發展,就連廣告代言都唔多見,全副心機都係放喺做歌、出歌之上,同時佢嘅演出永遠都係唔會令人失望,不但技巧充足,而且水準穩定。高手再隱世,始終都會得到有識之士嘅賞識同認可,2017年,Jason正式完成所有香港流行歌手嘅夢想,成功走上紅館舞台舉行一連兩場「陳柏宇Speechless演員會2017」。   要開一個紅館個唱,從來都唔係一個咁容易嘅任務,事關香港樂迷同觀眾一向受到嘅灌溉同培育,上得紅館,歌手總係需要飛天遁地、耍盡十八般武藝,噴火吞劍樣樣齊;對於Jason一個一直咁純粹地醉心喺音樂事業嘅歌手,難度都唔可以話唔大,但係佢都絕對係交足100分嘅功課,拿手好戲嘅專心唱歌固然絕無欺場,就連佢明顯唔熟練嘅載歌載舞場面,都一樣落力十足,直到演唱會尾聲,佢甚至滿足埋社會大眾對男歌手開個唱嘅「基本」要求:除衫,專業指數簡直爆燈。   4年後嘅今日,Jason第一樣fight for嘅就係一個佢心目中理想演唱會嘅模樣,足足整個上半場,佢完完全全係以歌會友,唔做半點多餘嘅嘢,專心唱歌,然後繼續專心唱歌,佢嘅歌聲當然仍舊係保持喺甚高水準,然後整個編排佈局更加係極具心思,由個人故事開始講起,並由成長階段中經歷過與至親嘅分別,逐步過渡到我城近年比比皆是嘅離合散聚,先見自己,再見眾人;神奇嘅係,以往嘅陳氏苦情情歌,今天再去細聽,竟也聽出其他更多意思,令人睇到更深意境:「要搬家,路上或更可怕;誰所有舊恨拒絕放下?誰亦有著缺陷你知嗎?」(《感情這回事》)。   不但係聽者有所感應,歌者都同樣深受觸動,「今天起各有逸後,如火花攜不走,無需要定擁有;曾相擁曾牽手,在心裡仍足夠,願我所愛以後帶著笑口便無憂」,唱到首本名曲《逸後》時,Jason更加係激動得久久未能平復,歌都唱唔到落去,觀眾一邊睇住螢幕放映著香港人過去一年半載都非常熟悉嘅離別畫面,一邊全場全情和唱,現場思緒濃烈而複雜;人生總有歡喜,難免亦常有淚,抹乾眼淚之後,Jason都繼續Fighting:「頭如何疲倦了也要抬得起,我就算沒有閃光燈被拋棄;生於寂寞世界更要強壯地,很尊嚴地和逆流做知己」,喺呢度都以Jason嘅《對得起自己》同一眾同路人打打氣:「燃燒的理想,明知不理想,仍必須衝上。」  

演唱會   陳柏宇   香港人   

陳柏宇相隔四年再開演唱會!成日話自己唔叻記歌詞嘅陳伯,今次為咗個唱絞盡腦汁背歌詞。今集2359 Ceci 就一於考考佢,將Jason嘅經典情歌全部 Google Translate成英文版!Looking back and smiling… I can cook by myself… 喺加拿大長大嘅陳伯,會唔會估到又唱到呢?即刻去片啦!(片尾仲有陳伯獻唱嘅小驚喜) @ckw720 @ceciwuchingsze Hair: Alex So @ the attic Make up: Jessica Chan Wardrobe: Bed J.W. Ford…

歌詞   演唱會   陳柏宇