在社會近年重大變遷下，集體經歷了低谷，人們對生活多了思考，甚至對娛樂也有了標準，開始拒絕「娛樂至死」。然而，這並不是港人第一次說不——在80、90年代，因當時的社會同樣面對着不確定，棟篤笑（Stand-up comedy）回應時代出現。

香港棟篤笑之父絕對非黃子華莫屬，甚至連「棟篤笑」之名也是出於其筆。一般港人即使不曾入場，也總有聞說其金句，例如「畀份糧你，一半係畀你要嚟做嘢，另一半係要嚟受氣嘅。」一句one-liner，完全戳中大家的笑點和痛點，從笑話中揭示人性、社會現象，而不是笑完就完，正是棟篤笑的魅力。曾幾何時，香港棟篤笑演出也是「爭崩頭」的一票難求。

「悲哀嘅係，香港對廣東話棟篤笑需求好細，反而喺外國，可能係一種情懷，佢哋會好treasure呢件事。」不論是一個人或是團體表演，即使台下小貓三四隻，甚或全席空位，中印混血兒Indome仍然享受在台以笑話來與大家對話。在黃子華封咪後的後棟篤笑時代，還剩下多少能讓人笑中帶淚的笑話？

文字：Hoiyan @seamouse_hoiyan
攝影：Andrew @andrew_bangchan
設計：Owen @wai.ho.98

｜誰是Indome
「Indonesia加上me，就係印尼嘅一個我。」他是香港土生土長的中印混血兒，因覺得行走江湖要有一個很強記憶點的名字，而他的本名都不太符合要求，便從同鄉營多撈麵中靈機一觸。最初的時候，他還不習慣何時該使用這藝名，直至一次錄節目時，撰稿員自然的喊：「Hello Indome！」頭頂的燈泡亮起來，Indome說：「佢最記得我呢個名，嗰刻開始唔再諗自己係邊個，Indome is my name。」

Indome在疫情期間失業，多了時間重整生活，才找到棟篤笑。不過他自言從小也會被稱讚有趣，而他亦樂於成為焦點：「我性格就係attention seeking，知道件事可以得到關注，就會做嗰樣嘢。」也因為同一個原因，改變了他回答「你係咩人」的答案，即使廣東話說得比印尼話流暢，出社會後的他總會自稱是印尼人：「讀書嗰陣會話係香港人，後來發現講係印尼人會特別咗。」所以，一樣在鎂光燈下的職業，也只有棟篤笑表演者最能吸引他，笑言：「演員、主持嘅焦點係角色同典禮，棟篤笑嘅關注喺晒自己度，全部觀眾都緊聽你嘅故事，呢個滿足感係最大。」

｜屢敗屢戰的棟篤笑精神
當初，Indome在FB看到陳樂添的棟篤笑課，便報名上堂，「棟篤笑同唱歌都係易學難精，你可以唱得好叻，但唔代表人哋想聽你唱，要搵到character。」完成課程，所有同學都會參與一場畢業演出，Indome還邀請了一眾親朋戚友前來。上台前，因為深知自己沒有記性，便預先把「提場」寫在手掌，萬事俱備，唯正式演出仍與幻想中的情景充滿落差，他飲恨似的自嘲：「上台已經開始唔記得，再望一望自己隻手，因為緊張出汗，所有字都化晒。」原本預計8分鐘演出，一下子大縮水變成3分鐘便鞠躬下台。

其實，所有笑話能正式搬上舞台前，大概經歷8個月的修正，「呢段時間，喺Open Mic去講呢啲試驗性笑話，不停改同試。」試笑話的過程非常重要，同一個笑話對不同性別、年齡的觀眾，也會有不同的效果，表演者能根據反應作出更精準的調整，也能考驗自己救場的能力，Indome分享表演者阿科的殺手鐧：「呢個笑話喺我個腦入面好笑啲。」不管每場Open Mic有多少觀眾，他們很是珍惜每次機會，只因為「現在一定比第一次好，今次一定比昨天好」，高強度的肌肉訓練才能正式舞台中綻放朵朵笑花，「我哋最勁嘅未必係寫笑話，反而係厚臉皮，呢個就係棟篤笑表演者屢敗屢戰嘅精神。」

｜荒謬就是笑點
怎樣才能無窮無盡的生出笑話？「我通常都係以生活經歷為主。」日常中，與女朋友、家人、寵物和新聞都是取材來源，只要嗅到可能性，Indome便會用電話錄音記下，而故事的有趣元素就是荒謬點。雖然荒謬點總是遊走在敏感位，但Indome則認為這就是表演者的使命：「講啲冇禁忌嘅笑話冇人笑㗎，我哋就係要搵出灰色地帶，用笑話將佢變模糊，等人可以接受。」Indome父母和大哥是牧師，性取向在基督教中尚為敏感議題，而「懷疑性取向」的一組笑話，正是其大膽的嘗試。

除此之外，Indome的棟篤笑團體「笑旅時代」，每星期也會落地做Open Mic，還會在IG進行《笑時一周》的直播，四人以時事新聞隨意發揮，「可以訓練點樣喺一件事演繹到唔同角度，又可以engage到觀眾。」他隨即保底說，撞車、司機與乘容的爭吵，甚至貓咬貓也是時事，並非政治，若這樣也被警告的話，笑言自己絕對是已經紅了一半：「至少做嘅嘢有啲影響力。」

｜沒有次文化的香港
「香港棟篤笑係落後啲，不過依家香港好多嘢都比較落後。」Indome直言港人對棟篤笑的需求很低，反而海外港人更會珍視，「可能大家真係好忙，主流文化外，唔會去搵其他次文化，但呢啲正正係一啲artists嘅成長。」看到其他前輩如陳樂添、阿V，即將到澳洲參加「Comedy Festival」，Indome更是堅定心中夢想：「如果喺呢度打唔到一片彩虹，就試下由外面打返嚟。」

這條路注定又長又遠，但他就是上了癮的為這個舞台着迷：「喺台上嗰種star嘅感覺係取代唔到。」談着棟篤笑的每一刻，Inodme七情上面，語氣生動，還有那雙熱情滿瀉的眼眸，就像他正站在聚光燈那束光下，正享受在萬人的笑聲之中，自信的說着一個又一個的笑話。