Follow us on social

OASIS | 余拜仁:開始令⼈擔⼼的Marvel Universe

近嚟戲院持續都係⼤排⻑⿓,除咗有永恆男神湯告魯斯載譽續拍嘅《壯志凌雲:獨⾏俠》,近⽇⼜有Marvel重磅製作《雷神奇俠4:愛與雷霆》上映,作為「漫威宇宙」 新階段嘅另⼀巨作,並且屬於⾸部突破「個⼈三部曲」模式嘅英雄電影,喺經過《奇異博⼠2:失控多元宇宙》雷聲超⼤、⾬勢飄忽嘅半滑鐵盧後,到底製作團隊今次交出啲咩成績?能唔能夠先為電影公司扳回⼀城,繼⽽再為「漫威宇宙」開闢更多疆⼟呢?雷神份屬元祖級英雄,早早已經同美國隊⻑、鐵甲奇俠等⼈維護住地球,以⾄係宇宙嘅和平,身為神嘅佢擁有呼喚雷電嘅神⼒,亦配有個⼈專屬嘅雷神之鎚;喺過去嘅 「個⼈三部曲」,以⾄其他群雄並起嘅⼤戰電影,雷神經歷過⾄親離世、兄弟鬩牆、情場得/失意,既拯救過半個地球嘅⼈⼝,⼜喪失過⾃⼰出⽣及成⻑嘅神域,喺起起伏伏中,佢試過迷失、消沉,然後⼀如其他英雄重新振作、抖擻,嚟到今集,仲有啲咩可以發展同突破呢? 答案係:相當乏善⾜陳。今集劇情(放⼼都係無咩劇透成份)⼤致係講神原來都唔係絕對無敵嘅,宇宙間係有⼀把「殺神劍」,有⼀位曾經受到衰(嘅)神虧待嘅⼈執起咗把劍,受到劍中遠古邪惡⼒量嘅加持(同⽀配),晉身成為屠神者展開咗宇宙殺神之旅,⼀嚟對⽅殺到埋身,踩⼊⾃⼰族裔嘅根據地,⼆嚟為咗全體神嘅福祉,以防神嘅全⾯覆滅,雷神決定挺身⽽出;聽故唔好駁故,先唔好講隨隨便便有把傳說中嘅魔劍,就可以輕⽽易舉創造⼜⼀個神級奸⻆,就算係神和神和神之間嘅廝殺衝突,本身就唔係啲咩新嘢,《雷神奇俠3》正正就係雷神同佢個⾛⽕⼊魔家姐嘅⽣死對決,打到原居神域都天崩地裂。不論係情節鋪陳⽅⾯,抑或係場⾯營造⽅⾯,今次嘅神級⼤戰都無⽐上次突破太多,並無為觀眾帶嚟太多印象深刻嘅地⽅;作為Marvel作品,呢個可以話係硬傷,畢竟連 《尚氣》同《奇異博⼠2:失控多元宇宙》兩部⼝碑稍遜嘅作品,前者有如《⽣死時速》般嘅單層巴⼠⾁搏追逐戰,後者有⼥魔頭硬闖法師神壇攻防戰。打嚟打去嘅⼤戰固然係Marvel電影不能或缺嘅基礎,同時個⼈掙扎及成⻑都係作品必不可少嘅元素,奇異博⼠也好、⿊寡婦也好,任何英雄英雌都好,基本上呢個都係作品公式嘅主要部分,好似之前所講,雷神⼀路⾛來都已經經歷唔少,今次最⼤嘅命題就係重遇當年嘅地球⼥友,千帆過盡,到底⼆⼈點樣⾯對⾃⼰同對⽅呢?⼀⽅⾯呢條線伏咗咁多集,係會令粉絲有所期待,另⼀⽅⾯佢嘅實際處理只可話係情理之中、無咩意外,加加埋埋,《雷神4》就僅僅成為⼀部「可以睇下」嘅電影,事實上不久前先登場嘅奇異博⼠都有類似問題,令⼈擔⼼嘅係,如果⻑此下去都係繼續維持呢種拍法、呢個⽔平,Marvel電影或會不幸淪為「變型⾦剛」系列,公司繼續要拍,影迷唔想再睇。

關於作者 / 余拜仁

由文化藝術到金融財務,涉足不同江湖| 志奮領學人(由英國外交、聯邦及發展事務部頒授及認證)| 倫敦國王學院數碼文化碩士/香港中文大學文化管理碩士| 嫻熟的文化藝術文字人/專業的金融財務策劃師