一切源於2017、18年的一場異鄉的相遇。

那年Christy剛到英國求學，人生路不熟，屢屢碰壁，偶爾一次踏進二手衣物店，一件標籤寫著「Made in Hong Kong」的襯衫赫然在目。那刻她心頭一震，一種難以言喻的激動油然而生：「我從來無試過，攞起一件死物，會有呢個感情。所以我好想將呢份感動帶返香港。」

這件襯衫，在數十年前或許跨越9000多公里從香港被帶到英國，最後竟然又橫跨大半個地球，跟Christy回到它出生之地。學成回港後，Christy開了古著店「南泱記」，繼續在世界各地尋覓、記錄「香港製造」衣物，又著手研究香港製衣業歷史。從一塊布料到一間小店，一步一步拼湊那段香港的舊畫面。

文字：Heidi @heidi.is.strong
攝影：Andrew @andrew_bangchan
設計：Owen @wai.ho.98 

｜與「香港製造」初相遇

拐進位於火炭的工業大廈，乘電梯抵達「南泱記」，溫暖的黃色燈光映照著衣架，整齊排列起一件件古著。細看衣服領口的牌子，發現為人熟悉的GAP、FILA、Patagonia等牌子，原來都曾在香港設廠，讓人嘖嘖稱奇。

1997年生的Christy，大學念的是時裝設計。在就學時期，已常與衣服為伴，又喜歡到美之等不同的二手衣服店尋覓靈感。到英國求學後，思鄉的感覺加上課業的壓力讓她喘不過氣。有次外出散心，在一間二手店發現了一件燈芯絨襯衫，標籤竟然寫著「Made in Hong Kong」。那一剎那，她竟然有點鼻酸：「自己讀書以嚟，一直覺得『香港製造』嘅嘢係好耐好耐之前嘅事情，甚至可能已經唔存在。嗰一下，覺得好神奇。」

雖然那件衫殘殘舊舊的，但Christy還是決定把它買走，及後又陸陸續續再到不同店舖尋找「香港製造」衣物。學成回港後，她想：「會唔會真係有機會，我可以將呢啲衣服全部帶返香港？我好記得自己搵到第一件『香港製造』嘅感情，所以我好想將呢份感動帶返香港。」2022年，「南泱記」正式開業。「南」字代表香港；「泱」取自Christy中文名字「映」的其中一部分，加上「水」，便合成了「南泱」。

｜「香港製造」背後

8年裏，Christy收集了約800件香港製作衣服，帶它們回港，再為他們尋覓珍惜它們的主人。時裝設計背景的她，特別對刺繡類，或剪裁特別的衣裳情有獨鍾。「我好鍾意佢哋點收口，睇啲拉鍊、鈕扣。雖然佢哋都係成衣，但剪裁咁特別，我會諗，究竟佢哋點樣控制成本？」在這段買賣的過程中，Christy也對「香港製造」四個字有了理解：「香港製造嘅特色，我諗咗好耐，最後答案應該係『快靚正』。」

「我自己覺得香港製造嘅衫係好靚，不過老一輩會覺得香港製作好『yarp（劣質）』，唔似法國、歐洲品牌刺繡咁精緻。但香港製造嘅衫可以喺最短時間之內，用最平嘅價錢做到最好嘅效果。而且香港女工好有創意，佢會用盡所有方法解決問題。」Christy隨手拿起了一間白色針織衫，驟眼一看，襯衫上以不同顏色的小珠，勾織成盛開鮮花的圖案，但仔細一看，才發現小珠根本全部都是半透明，顏色不同的，原來是珠子下面的棉線。「咁樣做可以增加立體感，同時又唔會好高成本，體現到香港人嘅『走精面』。」

Christy在「入貨」時，偏向選擇看上去較年輕，一般後生仔都能穿的款式，不過她後來發現，南泱記的顧客群比Christy想像中的更要闊，「甚至試過有婆婆同家人過嚟睇，原來婆婆以前有份做呢啲衫。佢無諗過香港仲可以搵到、見到咁多以前佢做過、見過嘅款式，勾起佢好多回憶。聽到呢啲故事，我都好開心。」

｜舊事物的歷史課

透過這間小店，她希望亦能勾起客人們的好奇，從而更了解今時今日的香港製造。

經營「南泱記」的這段時間，Christy形容自己最大的改變是，開始不能自拔地看書、上網查找、尋覓有關香港製造業的歷史。「不論製衣定係製造業，各行各業嘅過去我都好好奇。最後我發現，以前香港做嘅嘢真係好多好多，短短二三十年孕育咗好多事情。我覺得係好神奇嘅一件事，點解會咁少人知，或者咁少人提呢？」

｜不完美的完美

Christy逐漸對香港製造多了認識，發現香港以前不少製衣廠的客人都是美國品牌，例如「Christopher and Banks」、「Susan Bristol」等。不少美國家庭都會把二手衣物拿上拍賣網放售，這也成了Christy入貨的途徑。

她解釋，香港製造的舊衣物不難找，不過每次都需要花不少時間挑選。「畢竟大多都已經被保存了4、50年，呢啲衫，尤其刺繡、穿珠類，好容易甩線。而羊毛衫，對於某啲蟲嚟講又『好好味』。香港5、60年代又多做呢類型嘅衫，所以係最難保存。」

起初，Christy每次收衫後，都很擔心衣服有破損，特別是羊毛衫很容易穿窿，她也會小心翼翼地修補。「以前啱啱開業嘅時候，我會好擔心，死啦穿咗個窿，或者布料好大撻污跡，客人會唔會好介意？但有一次有個客人揀中一件未修補好嘅背心，畀錢嘅時候我話，唔好意思，膊頭位其實穿咗個窿。但佢話，唔緊要呀，舊衫係咁㗎啦！」這就如當頭棒喝一樣，Christy發現，對呀，這是舊衣服必然會發生的事情。「其實好多人唔會介意件衫爛咗，反而會視為穿著嘅痕跡。」也許這也是古著的意義。

———————

In ACOO, you can see #ACOOPerson.