你有試過做一件吃力不討好的事嗎？對無伴奏合唱團(A cappella）VSing @vsingofficial，堅持「課金」出原創歌或許也是一件任性的事——儘管每一個音部都扭盡六壬，但無伴奏合唱音樂總是只給人「和音」，甚至「配角」感，也不太多人會仔細了解一首好聽的A cappella是如何煉成。

事實上，VSing六個成員，都是獨當一面的音樂人，例如音樂總監Anna在麻省理工（MIT）及柏克萊音樂學院畢業；她又曾與黎明、陳慧琳等知名歌手合作；女主音Sharon是女子組合COLLAR成員Ivy So和Candy的歌唱老師；男主音Bernard是皇家音樂學院碩士生，常為歌手錄製大提琴與和音部分，其他成員都分別是歌唱老師、專業演唱會伴唱、編曲家等等。VSing未必是成員們在音樂路上最讓人感到亮眼的一章，但他們卻異口同聲說，自己愛的正是挑戰將人聲與人聲融為一體，更是born to be屬於A cappella。

Bernard這樣形容A cappella：「六個人加埋，唔同嘅聲音，但向住同一個目標，呢種係最特別最特別嘅。」；Anna亦認同：「人聲就係最直接嘅樂器。如果夾得好，好似打機咁過關斬將，特別過癮」。在這個攻關的旅途，他們「終極大佬」是希望把A cappella帶入主流。新歌《I Wanna Wanna》，為他們大聲說出了心底的宏願。

文字：Heidi @heidi.is.strong
攝影：Andrew @andrew_bangchan
設計：Kayan @yipyn

｜鑿破一種面向

談及A cappella，你或許馬上想起社交平台上的「acoustic cover」，柔和地翻唱別人的串燒金曲。VSing卻一直堅持以無伴奏形式創作流行歌曲。節奏口技雞腳說：「我啲阿叔，或者年紀大嘅人都會覺得，成班人（A cappella）嘰哩咕嚕，唔知做乜⋯⋯以往（大眾嘅）想法係，覺得A cappella好靜，但其實A cappella都可以好爆。」

VSing新歌《I Wanna Wanna》的副歌不斷重複「I wanna wanna」，頗有K-Pop的韻味。負責作曲的Anna解說，這是流行曲的「hook line」，意思是「勾住你的心」。雞腳也分享，這次他嘗試了加入一個低頻率，聽起來像是有非人類、機器感一樣的聲線，就像近年K-Pop流行常出現的電子鼓聲音——讓歌曲更Pop，同時也是一種自我挑戰。

K-Pop和A cappella，好似大纜都扯唔埋，Bernard解釋：「合唱嘅嘢，一係就relate到choir，一係就小清新。但其實如果你肯嘗試explore，有啲A cappella group唱出嚟嘅嘢，可能同一隊真band無分別。原來呢個genre有好多可能性。只要你願意聽，你會發現A cappella乜嘢風格都玩到。」Anna補充：「好多人覺得A cappella好細聲好溫柔。當然唔係啦！A cappella唔係一種風格，係一個形式。一隊band，都係玩呢啲樂器，但佢都可以玩好多唔同風格。其實我哋音樂一啲都唔奇怪，都係唱流行曲；我哋都係一隊band，只不過我哋嘅樂器喺口入面。」

｜被A cappella Hook my heart

說到這裏，你可能有個疑問，那我為何不選擇聽單純的Pop Music就好？或者是，他們為何要堅持做無伴奏合唱音樂？

Anna自小便發現無伴奏合唱音樂的美：「中學時候輕輕嘗試過，keep住都好鍾意人聲『和』出嚟嘅聲音，好直接亦都好有 impact，係最直接嘅樂器。」而Sharon對A cappella的愛，源自它的挑戰性，更是因為它將幾個人的聲音合而為一：「我18歲後離開葉氏兒童合唱團後，機緣巧合到青協香港旋律試音。一開始完全唔識咩叫A cappella，但日子耐咗，唱開mmo嘅我覺得a cappella對於音準準確度，人聲同人聲點樣可以融為一體，難度比起有伴奏音樂高好多，而我好鍾意呢個挑戰。」

Bernard亦是被A cappella純粹的人聲表達吸引。但他卻不視A cappella為「讓自己著迷」的事情，反倒是一種「耐力的訓練」，「唔係每一刻都好enjoy，因為實在有太多嘢阻住大家進步。例如大家會忙，大家有唔同諗法。六個人要向住同一個目標進發，係超級難嘅事。所以我哋彩排，要一齊搵大家嘅共鳴位。呢個係A cappella最特別嘅地方。」

人聲看似單調，但透過不同口技，可以激發無限可能。自學beatbox的雞腳說：「讓我最着迷的，唔係在乎於係咪唱好多show，賺到好多錢，讓我永遠着迷係因為A cappella帶出嘅可能性——你唔會想像到，人聲看似好簡單，好單調，但原來一班人唱歌，可以有咁唔同嘅效果，drive到你有唔同嘅move」。至於從中學便接觸A cappella的男低音馬仔，答案則十分簡單：「我只係有一種，覺得自己係屬於A cappella嘅感覺。」

｜披星戴月與你玩

《I Wanna Wanna》的概念——「這個夏天很想和你顏色鮮豔」源自馬仔：「我諗法好純粹，因為我覺得我走出街，見到嘅嘢都好單調。例如商場，都係嗰啲舖頭。我覺得好似好多方面都容納唔到唔同顏色嘅嘢。但我想見到同自己唔一樣嘅嘢，唔想見到同自己一樣嘅嘢。就算係我唔同意嘅嘢，我都想見到。」這個「不一樣」，或許也正包括了他們正在堅持的事情。

六個人，有歌聲、有創作人、有意念、有火，就是沒有大公司支持。雖說最近3首歌都獲藝能發展資助計劃贊助，但在此之前，作曲、填詞、錄音、拍MV，每個部分都要成本，「主流artist有好多音樂以外嘅協助，但其實我哋無。IG Post都係我哋自己做」，Anna無奈道。雞腳也說，可以的話也希望增加產量，無奈6位成員各有其他音樂工作需要兼顧，時間實在難夾。

萬物都有一種顏色，天空是藍色、雲是白色、森林是綠色，顏色構成了五彩斑斕的世界。Bernard形容，他們暫時是柔和的Pantone粉色系，但他們深信有朝一日，他們會變成鮮豔奪目的顏色。雖然他們自認「小眾」（暫時），但，即使披星戴月，他們仍是想繼續玩下去。大概是因為這是他們鍾愛的事情。

#VSing #acappella #無伴奏合唱 #流行音樂 #廣東歌

後記：環迴投射怪能量

既然歌曲談及「怪」，我們就問問六位成員，自己最怪的一樣事情是甚麼。

答案你又猜得到嗎？