在訪問前兩日的簽唱會上，發生了這樣的一幕：Kiri T正在和歌迷們玩猜歌名遊戲，但她在台上看著題目，腦袋卻一片空白，緊張得手忙腳亂，最後竟然連自己作品的名字都忘了。事後回想，她忍不住自嘲：「明明係好簡單嘅嘢，但我好似好Kam咁⋯⋯大家話『嘩，你記性，真～係好差喎』。我都話，我可能要食啲合桃補腦⋯⋯」

如果這種尷尬與焦慮是你曾有過的共鳴，那麼她即將在澳門舉辦的演唱會《Hello Introvert》，或許就是為你而設的一個「安全出口」。在這個演唱會，她邀請各位「I」人可以放心自己一個前來，被音樂治癒：「例如我都係一個唔擅於表達自己嘅人，或者有好多嘢唔敢講。但我希望呢個演唱會可以話畀大家聽——即使我哋性格咁迴避，但我哋都值得被了解、能夠被了解。」

「我依家都會embrace自己咁Kam。」Kiri T笑說。

採訪：Heidi @heidi.is.strong 

攝影：Andrew @andrew_bangchan 

設計：Larry @ialyrral_

｜不需要「被迫營業」的安全空間

對於很多 I 人來說，看演唱會往往伴隨著一種無形的壓力——害怕被要求站起來跳舞、害怕要表現得 High、害怕要一同高聲歌唱。「Hello Introvert」，是一個讓「I」人感到安全、舒適、自在的空間：「呢度唔會有好多機關或者娛樂，唔會叫大家要好雀躍起身。我會形容係好chill，想講嘢就講嘢，想唱歌就唱歌嘅形式。」

Kiri T這樣解讀「I」這回事：「其實I人都想要connection，只不過我哋嘅friendship要好exclusive，好gentle。我哋都鍾意好近，但可能係好近、輕輕咁講安慰你嘅說話。」這次，她希望在澳門百老匯舞台創造一個「Safe Space」，並正在探索各種適合內向者的「距離」。她又透露在歌曲選擇上希望營造一些「contrast」：「例如大家以為呢隻歌要好大力，其實可以好細力？或者以為呢隻歌好細力，其實原來可以好大力？因為對我嚟講，大家可能會誤會I人好冷漠，但可能我哋心底有好多嘢想講，只係怕打擾人哋。所以我都好想探索一下contrast呢個主題。」

｜和自己的「I」來一場和解

「大概幾年前，我成日會同朋友講，如果我E啲就好啦。因為每次上台都覺得好吃力，每次訪問都會好甩咳。以前我做音樂節目，我知道見到唔識嘅人，我會預早3、4個鐘冷靜，聽meditation嘅歌，『咚～』嗰啲。」 舊作《icouldusealittlehelp》裡的一句歌詞：「Why do I pretend again and again, that I’m stronger than I am?（為何我一再假裝自己比想像中強悍？）」，正正道出她從前漫長的自我拉扯。

這幾年香港人對 MBTI 、「I」與「E」的討論多了，社會也開始對「I」多了一份理解，「某程度上時代都幫咗我。」再後來，她發現自己的聽眾都與自己面對同一種困境：「佢哋都會話喺社會好大壓力，唔夠E。反而因為我企出嚟就係咁Kam，好多歌迷會同我分享，原來我啲歌會令佢哋覺得被了解，咁我都覺得呢件事好療癒。」

早些日子派台的《我可能是迴避型》，講的正是害怕踏前一步的這種情緒。若然因為自己掙扎或卻步，而錯過一些機會甚至一些關係，不會很可惜嗎？Kiri T則這樣認為：「如果因為你I而錯過一啲關係，可能呢個都未必係你想要嘅關係。」最重要的，是認清自己想要的是甚麼。

所以，Kiri T希望這場《Hello Introvert》演唱會，不只是一場演出，更像是一次「同類」的聚會。「我覺得唔需要有壓力去invite人、約人一齊。因為你哋已經約咗我，我已經約咗你哋啦！I’ll see you there！」

Makeup: @tammyau_makeup

Hair: @jamieleehair @issac_lo @hola.hair.pets

In ACOO, you can see #ACOOPerson.