人生如戲，但如果這場戲註定「壞咗」，你該如何演下去？ 在這個呼吸都帶著壓力的城市，我們越來越難尋覓一場簡單而純粹的大笑體驗。中英劇團助理藝術總監盧智燊（Edmond）11年前看過一場百老匯鬧劇《The Play That Goes Wrong》——一個關於業餘劇團誓要演好懸疑劇，卻迎來一場從頭錯到尾的演出的劇目。兩小時的劇中，平均10至15秒就已經有一件「出錯笑位」發生。11年後，他決定把這個劇本呈現給香港觀眾。就連演員劉雨寧（Nicole）收到劇本，第一句也大呼「點演呀」！ 劇中的那台戲不斷出錯，但各演員們盡力挽救，堅持把劇目演完演好；映照現實中各位的人生，又何嘗不是這樣？有時候我們總羨慕旁人過得順遂，埋怨自己頭頭碰著黑，時不予我。Edmond這樣詮釋「The Show Must Go On」的精神：「有啲嘢你以為唔得咩？原來你堅持咬緊牙關做啲嘢，你點都會有啲回報。所以人生就係咁，就算幾差，你都要行落去。希望大家睇完呢套劇，笑到橫隔膜都攰，出返去，繼續你嘅生命，咁就足夠啦。」 文字：Heidi 攝影：hct 設計：ZH ｜喜鬧劇起家的中英劇團 聽到「鬧劇」，香港人未必很熟悉，但若然談及周星馳電影中的無厘頭搞笑橋段，例如「蠱惑的槍」，你大概略知一二。盧智燊解釋，鬧劇大多設定了一些很荒謬的處境、事情，而劇中角色面對荒謬的方法，往往也很荒謬，「甚至離開我哋現實生活」。話雖如此，觀眾看到卻不會覺得突兀或抽離，「因為其實當中就係base on生活入面提升荒謬，comment緊『人生就係咁可笑』」。 盧智燊1998年加入中英劇團，至今27年，見證中英以「喜鬧劇」起家，「師兄師姐帶住我哋一齊做喜劇，好想延續呢個傳統」。及至11年前，他在英國觀賞百老匯現存最長壽喜鬧劇《The Play That Goes Wrong》，那時已覺得此劇本很適合中英，「佢裡面嘅笑位，密集程度、令人驚喜嘅程度、嗰種energy都好適合中英。」今年，眼見不少地區都陸續購入劇本版權，也有感劇團此時應該能夠處理相關技術，他遂決定洽談版權，這就是《你個戲壞咗呀！》的起點。 ｜完美地產生「錯誤」 在劇場的世界，要呈現一場完美的演出已不容易，要上演一場「完美的災難」更不容易。每個看似偶然的意外，從道具掉落到台詞錯亂，其實都經過了千錘百鍊。 《你個戲壞咗呀！》講述一個不專業劇團，臨時接演一部1920年代風格的謀殺懸疑劇《夏福山莊園謀殺案》，但演出時，無論演員或後台道具佈景全都出錯。盧智燊解說，這個「錯」分為兩種，分別是角色演出引發的錯誤，或道具錯位的連鎖反應。他又透露，全劇約兩個多小時，幾乎每10至15秒就有一個「錯誤」出現，數數手指，即全劇幾乎有數百個笑位！ 由於不少「錯誤」涉及佈景機關，盧智燊笑說，中英劇團這次「攞咗鉅額去排練」，特地打造幾乎一比一的排練佈景，提早個多月讓台前幕後一同開始密集式排練。例如，牆上的掛飾畫作跌落地、甚至演員跌低等，早一秒晚一秒都會影響笑位，甚至構成演員生命危險。演員故需反覆練習，「我喺中英20幾年，今次幾乎係第一次」。為何要這樣認真？盧智燊一語道破：「鬧劇最難嘅地方，係你如何將一個設計好嘅錯誤，演到好似係第一次發生，有『點解會咁樣嘅？』嘅organic反應。」 而劉雨寧回想起第一次看到偌大的排練佈景，當時的她也不禁「Wow」了一聲。她舉例，角色需要扔一些物件時候，物件的重量、大小都會影響落地的位置，以及對手的反應：「mark曬距離之後，叫我攞一嚿可以代替嘅嘢，不斷不斷喺度練。作為演員我都覺得，呢刻，character都需要放一邊，因為好多嘢都需要技術性練好。」 ｜認真做一個「爛演員」 然而，當技術和恐懼被克服，演員們此時才迎來最深層的挑戰：如何拾起那個被「暫時放一邊」的角色靈魂，即是一個演得不好的業餘演員？ 其中一個讓此劇本搞笑的點，是每個角色們都各自對表演有著荒謬的理解和執著。例如有角色極度渴望掌聲，會在演出中途突然「打破第四面牆」向觀眾鞠躬；又例如劉雨寧飾演的角色叫Sandra，是自戀狂，常覺得自己是「女王級的演員」，認為就算只是業餘劇社，都應該好好展現給觀眾，所以會不理劇情地「展現自己身體」，構成惹人發笑的劇情。這個角色是一個「overacting」的演員，收到劇本時，她心想，應該怎樣演？ 作為是次導演的盧智燊，他有感排練這部劇最大的陷阱，就是演員「為了搞笑而搞笑」，「因為我知道呢個係笑位，所以我做啲嘢令你笑」，這樣角色便會失真。他認為演員需要做的，是「認真做白痴嘢」，並全然相信角色的荒謬邏輯。「例如Nicole飾演嘅角色，其實佢並非刻意搞笑，而係發自內心地覺得『認真就係要Show off』，真心相信『呢啲就係演技，你哋就係唔識演技』。」正是這份真誠，才構成了喜劇的基石。 ｜舞台折射演員人生 舞台上那個「壞咗」的世界，奇妙地與演員的真實人生軌跡產生了共鳴。 在香港做演員，尤其是舞台劇演員，路途很難「一帆風順」。盧智燊憶述剛畢業時的一次「爛演出」：「我做過一個音樂劇，喺我心目中差到不得了。導演無乜諗法，歌又普普通通。但好奇怪，我哋成班演員圍埋一齊，我哋話，『死就死啦，做得幾多得幾多啦』。然後我哋畀足百分之二百嘅能量出去。演完之後，觀眾嘅反應竟然好好。我哋返到後台諗，『點解呢？』但原來，當觀眾見到一班演員，好努力地去做一件事嘅時候，嗰個能量係可以感動佢哋。」 劉雨寧也曾有類似的想法：「我覺得（質疑自己）係一定會，甚至我覺得每一日都會發生。可能突然之間，見到一個演員做得很好，或者突然睇咗一個好好嘅電影，就會覺得『哇，我喺度做緊乜？』，或者『我距離佢有幾遠？』，或者『我究竟識唔識演戲？』」 走過演員生涯的種種高低起伏，後來，盧智燊發現自己著眼點應該放在——在當下社會，劇場可以帶給大家甚麼？ ｜香港人，一同笑著走下去 「我覺得香港人要笑吓，係重要過一切。」盧智燊道。 「我覺得大家都好攰啦。無論係經歷咗疫情，或者依家經濟無以前咁好，維生、謀生，其實好多煩惱。我成日都會想問吓人，你上一次笑到咔咔聲，係幾時？好多人都要諗㗎。咁上一次，兩個鐘你都咔咔聲係幾時？我覺得，喺劇場，你可能會搵到呢個空間。」 盧智燊希望，這次的演出可以讓觀眾放下生活中的一切，甚麼也不用想，和大家一起經歷這一次「Everything Goes Wrong」。「其實劇中每個角色嘅目標都係要做一場好戲。就算出咁多錯，佢哋都無cut show，繼續做落去。雖然我哋生命會有好多不完美，有時候我都覺得，我哋咪笑住行落去囉！」 In ACOO, you can see #ACOOPerson.