【余拜仁】：寫在NFT熱潮退卻之前

呢排全球投資市場都係哀鴻遍野，傳統嘅各地股票似有進入熊市嘅徵兆，新興嘅虛擬貨幣（Cryptocurrency）以至與此關係密切嘅數碼商品，例如NFT（Non-Fungible Token）等等，都係全面報跌，甚至令人擔心係咪有機會跌入死亡螺旋（Death spiral），當中比特幣（Bitcoin）一度下試3萬美元重要關口，NFT嘅市場甚至更早出現熱潮退卻跡象，其交易量較高峰期大跌超過9成；姑勿論讀者係一直搵緊長遠資產增值工具，希望用嚟準備移民或者退休，定還是本身對數碼金融同埋文化藝術深感興趣，NFT呢類科技產物都係位於世界發展嘅中心，識多少少似乎都係有備無患嘅，問題反而係有咩方法、有咩渠道呢？ 喺當代社會中，有嘢唔識唔明，最快最易當然係求助於Google大神，甚至Wiki小神，不過呢，Cryptocurrency又好、NFT也好，背後都係牽連住一大批專業術語（Terminology），包括區塊鏈（Blockchain）、分散式帳本（Distributed Ledger），相對於NFT，又有FT（Fungible Token；同質化代幣），睇下睇下都如墮五里霧中；與其閱讀文字，或者睇下實物仲易跨過入場門檻：K11 Musea依家就搞緊一個名為《Metavision》嘅NFT藝術作品展，展出超過30個創作單位嘅超過200件展品，包括被譽為NFT神童、年僅8歲已經活躍創作嘅Arthus Ng（香港），以及多位本身早已譽滿國際嘅藝術家，包括Joan Cornella（西班牙）同村上隆（日本）等等，展覽嘅宗旨就係讓所有人都有機會盡情探索被譽為Web 3.0嘅元宇宙。 熟悉文化藝術或者消費購物嘅讀者，或多或少都會知道，K11本身係一個商業機構，同時又會經常做普及藝術嘅工作，由於佢有趣嘅雙重身分，旗下項目提供到不同於正規美術館同博物館嘅體驗，例如後者嘅策展講求專業研究同文化脈絡，以NFT一個咁新鮮咁前沿嘅領域，若要出現喺傳統藝術殿堂，可能仍須經過一輪學術驗證，K11則可以填補到呢一個位置、發揮到另一種功能，喺一個普羅大眾都可以去到嘅場域，呈現大家都可能好奇同關注嘅藝術作品；以作品佈局嚟講，《Metavision》亦都有別於一般展覽，展品往往集中喺個別展廳，觀眾需要專誠入去全心睇嘢，今次嘅作品係藏身喺K11 Musea唔同樓層，於是觀眾一邊行緊商場食嘢買嘢、一邊遇上唔同作者嘅作品，包括比較純粹嘅藝術創作、非常流行嘅Profile Picture等等。 散落式嘅策展有佢嘅好處，觀眾可以隨時、隨意、隨心搵嘢去睇，啱睇就留，唔啱就走，同時都有機會唔夠滿足，覺得缺乏觀展嘅脈絡，如是者，觀眾都可以考慮參加專屬導賞，以一個較為宏觀嘅角度切入《Metavision》，留意番名額非常有限，同時仲有多場多媒體演出同工作坊，教大家整下NFT數碼頭像等等，有興趣就自己出少少力上網搵下資料，整個展期去到6月19號（到時唔知啲Bitcoin升番未？）。 K11 Musea依家就搞緊一個名為《Metavision》嘅NFT藝術作品展，作品係藏身喺唔同樓層，於是觀眾一邊行緊商場食嘢買嘢、一邊遇上唔同作者嘅作品，包括比較純粹嘅藝術創作、非常流行嘅Profile Picture等等。