搜尋結果: #正義迴廊
OASIS｜余拜仁：你起咗筷未？
當通關安排都大致完全打通，香港社會都可以話係真正復常，於是乎近日走到街上，大家都可能開始覺得人頭湧湧，有啲返到以前旺區經常出現人車爭路嘅盛況，同時戲院又好、劇場又好，紅館更加係唔駛講，基本上唔同嘅演出都係場場爆滿，演出長做長有，其中近日最爆紅，買飛買到最多怨氣嘅可能就係「神神聯手」嘅《愛我別走》，雖然票務系統今次係相對暢順，唔駛由朝到晚「321」倒數，或者全日手動F5，但係當你見到自己個籌係排到十幾萬、廿幾萬，甚至六十幾萬，其實都係同樣萬念俱灰，繼續嘆句「睇場騷姐」。 《愛我別走》之爆，絕對不難理解，就算咩都唔計，單係一個「子華神」已經夠晒號召力，適逢佢本尊呢排都係紅運當頭，繼《飯戲攻心》後，另一擔大旗之作《毒舌大狀》繼續大破紀錄，就算明明係沉重而認真嘅正片片種，放喺農曆新年合家歡檔期一樣遇神殺神、再闖高峰；就算坊間偶有評論指電影「只係爽片一套」，以至部分法庭情節「離地」，結局放諸香港現今社會實況，更加似係睇緊「科幻片」，一樣無礙票房屢創新高嘅凌厲走勢，於是，部分觀眾睇完林涼水都仲未夠喉，想走入劇場睇埋黃子華去做一個同Time Traveler有關嘅舞台劇，都係情理之中、自然不過。 同時，香港劇場其實都好多元同繽紛，除咗《愛我別走》之外，仲有好多其他有趣表演節目可以選擇，《各位起筷》就係其中之一；不過，有言在先，嚟緊你睇到嘅並唔係一篇推銷Sell飛廣告文，事關截至開筆呢刻，一連16場演出嘅門票已經全部售罄，就算依家你想立即「補飛」購票入場基本都係無咩可能，不過睇完篇文至少你有機會認識多啲本地創作人同佢哋嘅作品，下次可能無咁後知後覺。 言歸正傳，《各位起筷》係由四位香港演藝學院紅褲子出身嘅演員聯手製作：麥沛東（麥東）、巢嘉倫（阿巢）、陳嘉威（Donald）同梁嘉進（Eric）；喺普羅觀眾眼中，麥東應該係最為人熟悉嘅，早少少時間上演嘅《媽媽的神奇小子》，佢係入面其中一位神奇隊友；呢一排叫好叫座嘅《正義迴廊》之中，佢係叫人「屈我啦，屈我啦！」嘅唐文奇，其他三位同麥東份屬同屆同學，功底紮實不在話下，同時四人早喺學校已經非常投緣，畢業多年之後始終堅持一齊搞一台戲，台上台下嘅默契都應該唔駛擔心。 功底扎實同有晒默契係一回事，作品好唔好睇又係另一回事，仲要睇番好多因素：「受惠於」疫情，佢哋有長達兩年時間去認真籌備今次製作，單係劇本都寫咗兩個截然不同嘅版本，呼應番時代嘅變遷，其中執筆嘅鄭國偉係非常資深嘅編劇，作品早已獲得不同殊榮，其中《最後晚餐》就以黑色幽默手法寫出低下階層喺生活中嘅掙扎，精準有力；至於執行導演一職就由新銳盧宜敬擔任，雖然佢前年先啱啱喺香港演藝學院畢業，但係已經憑住畢業作品《金龍》獲得校內傑出導演獎，並且同時獲香港舞台劇獎最佳導演（喜劇／鬧劇）同香港小劇場獎最佳導演嘅提名，令人眼前一亮，值得持續留意。 單喺牌面上睇，已經完全理解就算沒有鋪天蓋地宣傳，《各位起筷》仍然可以收穫一票難求嘅佳績，所以睇緊篇文嘅你，今次走寶都唔緊要，下次帶眼識貨就好。
OASIS｜余拜仁：劇壇盛事浪接一浪
世界盃嘅戰火短暫熄滅，球迷們都可以抖抖氣同休息一下，以至花啲時間做下睇波以外嘅事，例如入下劇場接觸下藝術創作；話說呢排本地劇壇可以話係盛事連連，其中文化中心更加成為大小劇迷，以及劇界中人非到不可之地，事關兩大經典戲寶分別喺劇場同大劇院同期上演：《十二怒漢》結集咗本港12位藝術同行政總監聯手演出，《天下第一樓》更加誠邀到劇帝謝君豪重返舞台，兩大節目頓成一時佳話。 近期非常火熱嘅電影《正義迴廊》以香港多年前嘅弒親真人真事為創作主軸，其中陪審團嘅角色、功能同運作就係焦點之一；《十二怒漢》同樣係法庭戲，而且更加徹底由頭到尾都係12位陪審員退庭商議嘅過程，不論係對白嘅刻畫、角色嘅互動、情節嘅推演，都引起好多有關法治精神同社會公義嘅反思。一台戲12位演員，人人都有戲演、個個都係主角，而主辦單位香港戲劇協會更加破天荒邀請到12名本地藝團嘅現任同前任總監同台演出，呢一種台慶式「晒冷」嘅手法，喺市場營銷上極具效用，於是《十二怒漢》票房一開已經賣個滿堂紅，加場再加企座，都仍然係一票難求。 《天下第一樓》則係香港話劇團前駐團編劇何冀平嘅成名作，曾經獲得包括文化部「文華獎」同中國戲劇文學「曹禺獎」等多項殊榮，劇作1988年喺北京人民藝術劇院首演後喺香港、日本、南韓、新加坡、台灣，以至歐美等全球各地演出，更曾改編成電視劇，今次再度重回香港舞台，成功邀請到話劇團前首席演員謝君豪領銜主演，呢一位金馬獎影帝近年活躍於電影世界，今次再踏台板，同樣令到一眾劇迷期待不已；《天下第一樓》嘅故事環繞住名噪京城嘅烤鴨老字號「福聚德」，老掌櫃因病退居幕後，但係兩名少東終日不務正業，好彩得到外援拔刀相助，先至喺幾年內將老字號扭虧為盈，可惜兩位富二代不憤對方功高蓋主，誓要一爭長短，天下再無寧日。 劇壇盛事一浪接一浪，《十二怒漢》啱啱先圓滿結束，《天下第一樓》就正進入演期最後一周，《飯戲攻心》踏台版嘅優先訂飛都已經喺一片叫好叫座嘅呼聲中結束咗，挾住香港最賣座喜劇嘅美名，唔少觀眾都好奇將呢個劇本搬上舞台，到底會係點樣？雖然電影版嘅經典6人組合只留一人，但係包括周國賢同梁仲恆等新成員近年喺舞台同電影等唔同領域都大放異彩，同樣讓人非常期待。
OASIS｜紅眼：《正義迴廊》：我們迷失在這場審判遊戲
說一個冷笑話，作為 2022 年其中一部最出色的香港電影，故事主題「居然」是在法庭上看控辯雙方律師和陪審團爭論何謂正義、公義和公正。若果你仍有留意每天上映的法庭新聞，誰人認罪，被還押或判刑多少年，而又有誰的控罪被撤回，更覺得電影橋段愈是陰暗沉鬱，現實世道愈是魔幻歡誕。 可能真是最壞的年代，就會是最好的年代，當眼前的現實生活不斷沉降，有時教人無言以對，說不出聲，另一邊廂那些被抑壓的聲音卻轉移到電影世界大放異彩。由翁子光監製、何爵天初次執導的《正義迴廊》，初看確實有點像翁子光的前作《踏血尋梅》，但兩者分別也很明顯，《踏血尋梅》是血腥慘絕，但相對上較傳統的懸疑緝凶戲碼，而《正義迴廊》則圍繞眾聲喧嘩的「法庭戲」讓案件重演，對照人來人往各執一詞，卻難為正邪與公義劃下界線。誰是真正凶手，誰是最邪惡的魔鬼，懸念最終還是交給觀眾判斷。 過去多年，對所謂「法庭戲」從來都有點抗拒，或許先入為主認定了庭上那些針鋒相對、機關算盡的咬文嚼字，都不過是體制下的語言藝術。不過，《正義迴廊》卻以小小法庭上的恢宏佈局，揭開了疑犯、證人、受害者家屬、法官、控辯代表律師及陪審團的眾生相，展現了錯綜複雜、善惡真偽模稜兩可的唇舌之爭，每一步棋都令人膽戰心驚。證人未必可靠，供詞可以造假，或出於恐嚇屈打成招，司法術語或者只是一門偽術，威權不一定公道，也不足以釐清真相，最終，制度總是凌駕於真相，也其實唯有熟悉遊戲玩法的一方，才是勝利者 —— 魔鬼再罪無可恕，卻可以輕易打敗那些只懂空談民主原則的正義聯盟。 是很諷刺，甚至是很惡毒的結論，卻正正戳穿了當下的政治現實。 劇本處處精密，諸位演員各自稱職的演出，當然應記一功，但亦可能關乎到我們對「法庭戲」所依賴的整套司法體制，於今日難以表述的政治現實裡，早已變得面目全非。神聖莊嚴的表象下，這個權威冠冕的場景，這些台詞，這些角色與崗位，都充滿了抹之不去的荒誕感，難免份外有著一股詭譎的戲劇張力，看得不寒而慄。 電影以 2013 年轟動一時的「大角咀肢解父母案」為故事原型，然而，我一邊看，卻一邊覺得它跟 2019 年另外一宗全港關注的凶殺案身影重疊。其實，我們都記得，那宗凶殺案仍然未審，甚至永遠都不會開庭。而電影裡的唇槍舌劍、對公義的叩問，是我們永遠不能抵達的遙遠。 據資料顯示，《正義迴廊》自正式上映以來，口碑甚佳，編導演皆有精湛表現，惟票房並非特別突出。這不難理解，現實早就讓人深感疲憊，一切既已粉碎，逝者亦已逐漸遠去，何必再三戳穿，把那些徒勞無功的事情扯回來？人皆渺小，並非眾生都有薛西弗斯的毅力，仍然記得又如何？念念不忘未必一定有迴響，與其去繼續探問冤獄可恥還是公義與良心較值錢，大家都可能情願付錢入場多看兩次《飯戲攻心》跟林明禎隔著銀幕親一個。