或者「疲勞」都已經唔足以去形容香港人嘅抗疫情緒，甚至係「麻木」或者「消殆」，因此當領導人表示「明白到大家嘅容忍力都已經到頂」，預告下月可能放寬唔同社交距離措施，雖然依家公共行政方面都呈現出一種「一日未發生，一日都未成真」嘅千變萬化局面，但係市面上都已經係一片歡騰，而當香港社會千辛萬苦先有機會迎來少少鬆綁，我哋嘅老朋友、老對手新加坡就已經宣布入境限制同口罩令將會雙雙解除，「邁向與病毒共存」，消息一出，立即致電星洲嘅老友恭喜下、Update下近況，傾傾下就發現，防疫政策嘅過嚴過緊，甚至朝令夕改，絕對唔只影響到大家夜晚無得出去行街睇戲食飯，更重要嘅係一個城市嘅光芒都會徐徐耗盡。

疫下生活，無論係本地朋友又好，抑或係海外朋友都好，不定期Zoom talk、Teams talk或者Meet talk都係一件樂事，剛剛就同咗香港同埋新加坡一啲表演藝術製作人圍下爐、解下悶，交流下兩地同業喺疫境下嘅工作同部署，本地行家就當然係叫苦連天，正如業界代議士都公開質問政府領導「點解髮型屋可以開？其他根本都無爆發疫情過嘅劇院劇場音樂廳又唔可以開？」（利申：我哋其實對髮型屋係毫無敵意，都舉腳贊成佢哋要開嘅），其實呢個問題埋藏咗喺成個業界嘅心底大大話話都已經一年半載，當然都係懸而未決啦，業界朋友其實都認咗命，反而星洲同業果邊嘅工作氣氛就好好多，目前為著今年嘅大小演出密鑼緊鼓籌備當中。

那邊廂香港嘅文化藝術行業接近完全停擺，唔知各位讀者知唔知道，貴為本港文藝旗艦活動嘅香港藝術節其實呢排都係發生緊，聽晚已經去到閉幕演出，係由上海歌劇院製作嘅音樂會版歌劇《鄉村騎士》同《丑角》，喺未來一個月仲會做埋全球網上點播，不過畢竟要將現場演出轉到螢幕觀賞，對唔少觀眾嚟講，吸引力都難免大打折扣；那邊廂新加坡嘅情況就已經接近一切復常，除咗本地創作之外，唔少世界級嘅藝術家都正準備喺新加坡嘅巡迴演出，據了解，近年風靡全球嘅希臘劇場大師Dimitris Papaioannou都會喺8月去到當地搬演作品，仲記得大師早年嚟香港同去台灣嘅時候，風頭都係一時無兩，節目都係一票難求，難怪當聽到呢個最新消息時，在席圍爐嘅業界朋友都即時笑言「8月新加坡見！」

外地團嚟唔到香港，觀眾少咗欣賞世界級作品嘅機會，業界又無咗同各地同業交流嘅場合，但係損失其實遠遠唔只係咁，人哋入唔到嚟嘅同時，我哋要出去都同樣好難，話說今年係回歸25周年，聽聞唔少藝團都獲得頗多資源，準備咗去到世界各地演出同交流，引用官方近年好鍾意嘅說法，就係「展示一下香港嘅文化軟實力」，可惜因為香港出入境嘅防疫安排實在太嚴，一出一入事後需要隔離時間好長，嚴重影響咗團隊上下前前後後嘅工作日程，計唔掂數之下所以最終都無辦法成行，幸好嘅係，出入境隔離安排嚟緊都會稍為放寬，唯有希望喺世界已經忘記香港之前，我哋嘅孤島鎖國式防疫措施真係會有機會告一段落，讓社會真係可以全面重回正軌。