（圖像經過包膠，無碼version請親自到台灣睇。）

「下流詩人」松島安（ @matsushimaon_hk ）衝出香港！聽聞早排松島安趁空檔，「亂入」台灣大玩創作，仲同合作無間嘅好友——菲林攝影師臭熊（ @sk8erhk ）一齊創作咗一輯以情色公仔做主角嘅作品！ACOO小編去咗台北直擊展覽，即場請到臭熊為大家介紹呢輯最新作品！

由2018年起，松島安就已經將廣東話色情粗口同街頭塗鴉結合創作——以獨有而辨識度高嘅字體，將一句句「色情打油詩」寫喺香港不同角落，形成香港獨有嘅風景。臭熊話，松島安一向「寫開街」，今次去台灣想試啲唔同嘅嘢，所以就決定用情色公仔，喺上面塗鴉，「然後我哋將字眼，用相片呈現畀人睇」。臭熊最後選擇咗用120菲林，進行呢輯相嘅創作。

眼前幾幅攝影作品，兩個「Mary」幾可亂真，問到佢哋點解會揀公仔，唔用真人模特兒？臭熊解釋，過往佢哋做類似嘅作品時，只會搵身邊嘅朋友，亦都唔會牽涉金錢交易，「我又唔想以買賣形式，租咗個model，但佢又唔明我做乜，之前嘅model係完全明白松島安寫緊乜，有睇開佢嘅嘢，知佢係乜人嚟嘅，知自己要做啲乜」。最後，二人靈機一觸：「與其請個model，今次不如買兩隻玩具，試吓玩啲新嘢啦！」

除此之外，展覽另一邊亦有個黑房，入面係松島安喺台灣時候，沿途就地取材嘅創作。臭熊透露，松島安除咗入鄉隨俗，以國語創作咗幾句對聯之外，佢亦就地取材，例如試食過檳榔，又喺飛機上偷咗張安全指引需知，再喺上面「提字」。參觀者入去黑房時，要用紫外光燈，逐個逐個詩句搵出嚟，有種窺探秘密，要靠自己發掘未知嘅刺激感覺！

至於點解首個海外展覽會選址台北？臭熊話，有見香港台灣文化接近，大家都係用繁體字，加上近年多咗香港人去咗台灣，「或者係可以走出香港嘅第一步」。另外，臭熊亦都話，松島安同佢都希望移台嘅香港人，都可以藉住呢個展聚一聚，睇吓笑吓吹下水。

想睇松島安同台北呢個地方會擦出乜嘢火花同碰撞？剩返幾日咋，假如你咁啱喺台北，就記得把握時間去望一轉啦！

《松島安の台北瀟灑射一回》展覧2023
展期：8月5日-8月15日
時間：11:00am-9:00pm
場地：濕地 @venue.tw
地址：台北市中山區林森北路107巷10號
票價：免費
策展：Wonderwall @wonderwall.today